मोबाइल हरायो ? नो टेन्सन ! यसो गरे भेट्न सकिन्छ सजिलै

यदि तपाइँसँग महंगो स्मार्टफोन छ र हराउँछ कि भनेर चिन्ता छ त्यस्तो पिर छोडिदिनुस् । स्मार्टफोनमा विभिन्न सुविधा हुन्छन् । त्यस मध्ये एक हो कुनै पनि चिजको ब्याकअप राख्ने सुविधा अर्थात तपाइँको मोबाइलमा भएका सबै कुराहरु कुनै पनि मेलमा सुरक्षित राख्ने गरी सिङ्क्रोनाइज गर्ने सुविधा सबै स्मार्टफोनले दिएका हुन्छन् ।
यदि तपाइँसँग कुनै नयाँ स्मार्टफोन छ भने यी ट्रिकहरु सँधै सम्झिनुस् ताकि तपाइँको फोन हराएपनि भेटियोस् अर्थात ट्रयाक गर्न सकियोस् । तपाइँको स्मार्टफोन हराइहाल्यो भने पनि खोज्न सकिन्छ र भेटाउन कठिन छैन । यहाँ कुनै पनि स्मार्ट फोन हरायो भने कसरी भेटाउन सकिन्छ भन्ने विषयमा चर्चा गरिएको छ ।

आईफोन
एप्पलको आइफोनमा 'फाइण्ड माइ आईफोन' भन्ने सर्भिस हुन्छ । यो लोकेशन ट्रयाकरबाट तपाइँको आइफोन कहाँ छ भन्ने कुरा सजिलै थाहा पाउन सकिन्छ । आइफोन छ भने यो सर्भिस एक्टिभेट गरिहाल्नुस् । यो एक्टिभेट गर्नका लागिः
सेटिङ्ग्समा जाने अनि > आई क्लाउड > फाइण्ड माइ आईफोनमा जाने र अन गर्ने ।
यसले तपाइँको आइफोन सजिलै भेटाउन मद्दत गर्छ । यदि आइफोन हरायो भने तपाइँले अरुको आइफोनबाट लगइन गरेर आइफोन रहेको स्थान थाहा पाउन सक्नु हुन्छ । आईक्लाउड आकाउन्ट लगइन गरेपछि स्क्रीनमा तीन अप्सन आउँछ - प्ले साउण्ड, लस्ट मोड र इरेज़ आईफोन ।
प्ले साउण्ड अप्सनबाट स्मार्टफोनको अलार्म बजाउन सकिन्छ । कतै नजिकै भए आइफोन अलार्मबाट नै भेटाउन सकिन्छ भने हराएको भए डाटा हटाउन सकिन्छ । लष्ट मोड अप्सनमा हराएको स्मार्टफोनमा ४ अंकको पासकोड बनाउन सकिन्छ त्यो राखेपछि कसैले पनि तपाइँको आइफोन अनलक गर्न सक्दैन । त्यतिमात्र होइन यसबाट स्क्रिनमा मेसेज समेत खोज्न सकिन्छ । आइफोनमा रहेका डाटा संवेदनशील छन् भने त्यसलाई हटाउने अर्थात इरेज गर्ने अप्सन पनि हुन्छ । यसो गर्नका लागि आईक्लाउड आकाउन्ट लगइन गरेपछि कम्प्युटरबाटै यस्तो काम गर्न सकिन्छ ।

एण्ड्रोइड स्मार्टफोन
यदि तपाइँसँग एण्ड्रोइड भर्सनको स्मार्टफोन छ भने यसमा 'एण्ड्रोइड डिभाइस म्यानेजर' को प्रयोग गर्नुस् । यसले आइफोनको 'फाइण्ड माइ आईफोन' जस्तै काम गर्छ । यसका लागि तपाइँले आफ्नो स्मार्टफोनमा गूगल अकाउन्टबाट सबै ब्याकप अप सिङ्क्रोनाइज गरेको हुनु पर्छ ।
यदि तपाइँको स्मार्टफोन हरायो भने अर्को डिभाइसबाट गुगल अकाण्ट लगइन गरेपछि यसमा पनि आइफोन जस्तै ३ वटा आप्सन आउँछ । पहिलो अप्सन रिङ, दोश्रो लक र तेश्रो इरेज ।
रिङ अन गर्दा हराएको स्मार्टफोनमा अलार्म बज्छ र नजिक भए सजिलै पत्ता लाग्छ । लकको माध्यमबाट हराएको स्मार्टफोनमा सुरक्षित पासवर्ड राख्न सकिन्छ । जुन अरुले अनलक गर्न सक्दैनन् । र यदि हराएको छ भने यसमा रहेका संवेदनशील डाटा हटाउन सकिन्छ । अरुले कम्तिमा हेर्न नसक्ने वा दुरुपयोग गर्न नसक्ने बनाउन सकिन्छ ।
आफ्नो स्मार्टफोन जोगाउन यी शुत्र कहिले पनि नबिर्सनुस् ।